Madhya Pradesh Urdu Academy BHOPAL

  • Home
  • aflak se aata hai nalon ka jawab aaKHir

aflak se aata hai nalon ka jawab aaKHir

aflāk se aatā hai nāloñ kā javāb āḳhir

karte haiñ ḳhitāb āḳhir uThte haiñ hijāb āḳhir

ahvāl-e-mohabbat meñ kuchh farq nahīñ aisā

soz o tab-o-tāb avval soz o tab-o-tāb āḳhir

maiñ tujh ko batātā huuñ taqdīr-e-umam kyā hai

shamshīr-o-sināñ avval tā.ūs-o-raubāb āḳhir

mai-ḳhāna-e-europe ke dastūr nirāle haiñ

laate haiñ surūr avval dete haiñ sharāb āḳhir

kyā dabdaba-e-nādir kyā shaukat-e-taimūrī

ho jaate haiñ sab daftar ġharq-e-mai-e-nāb āḳhir

ḳhalvat kī ghaḌī guzrī jalvat kī ghaḌī aa.ī

chhuTne ko hai bijlī se āġhosh-e-sahāb āḳhir

thā zabt bahut mushkil is sail-e-ma.ānī kā

kah Daale qalandar ne asrār-e-kitāb āḳhir